फलटण प्रतिनिधी : दिवाळी सणाच्या पार्श्वभूमीवर विडणी ग्रामस्थांची दिवाळी गोड व्हावी आणि प्रत्येक कुटुंबाच्या घरात आनंदाचे वातावरण निर्माण व्हावे, या उद्देशाने लोकनियुक्त सरपंच श्री. सागर कांतीलाल अभंग व नवरात्र उत्सव समितीच्या अध्यक्षा सौ. अमृता सागर अभंग यांच्या वतीने ग्रामस्थांना आनंदाचा शिधा वाटप करण्यात येणार आहे. मंगळवार, दि. ३ नोव्हेंबर २०२६ पासून या उपक्रमाला सुरुवात होणार आहे.
विडणी येथील सोसायटी रेशनिंग दुकान तसेच विडणी ग्रामपंचायत येथे आनंदाचा शिधा वाटप करण्यात येणार असून, या उपक्रमामुळे ग्रामस्थांच्या दिवाळीच्या आनंदात भर पडणार आहे.
गणेशोत्सव आणि नवरात्रोत्सवातही विविध उपक्रम
सरपंच सागर अभंग यांनी यापूर्वी गणेशोत्सवाच्या काळात विविध धार्मिक व सांस्कृतिक कार्यक्रमांचे आयोजन केले होते. तसेच नवरात्रोत्सवात महिलांसाठी ‘होम मिनिस्टर’ स्पर्धा, गरबा आणि दांडिया यांसारख्या कार्यक्रमांचे आयोजन करण्यात आले होते. या उपक्रमांमुळे गावातील नागरिकांना उत्सवात सहभागी होण्याची संधी मिळाली आणि गावात उत्साहाचे वातावरण निर्माण झाले.
प्रत्येक कुटुंबाची दिवाळी गोड व्हावी, हाच उद्देश
याबाबत बोलताना सरपंच सागर अभंग म्हणाले, “माझ्या परिवाराबरोबरच गावातील सर्व ग्रामस्थांची दिवाळीही गोड व्हावी, या भावनेतून आनंदाचा शिधा वाटप करण्याचा मानस आहे. सण-उत्सवाच्या आनंदात गावातील प्रत्येक कुटुंब सहभागी व्हावे आणि सर्वांच्या घरी आनंदाचे वातावरण निर्माण व्हावे, हाच या उपक्रमामागील मुख्य उद्देश आहे.”
दिवाळीच्या आनंदात ग्रामस्थांनाही सहभागी करून घेण्याच्या या उपक्रमाचे विडणी परिसरात स्वागत होत आहे.
